Маслиново масло

Чисто, девствено маслиново масло од Халкидики, светски познато по својот вкус и квалитет. Не случајно нутриционисти ставаат голем акцент на овој производ, имено маслиновото масло се смета за еден од најздравите производи во светот. Ваквото масло се добива преку пресување на плодот исклучиво со механички средства. Плодот мора да биде од висок квалитет, а температурата на процесот на притискање не смее да надмине 40 степени.

Од истата причина процесот е познат како ладно пресување, бидејќи се создава притисок само при гмечењето, без дополнителни растворувачи и хемиски супстанци. Резултатот е чисто, природно маслиново масло, извлечено директно од семето. Маслиновото масло е вистински белег на Халкидики и може да го најдете буквално на секој чекор, во сите поголеми и помали продавници. Ќе бидете изненадени од неговиот уникатен и богат вкус, кој ќе донесе изворен медитерански мирис во Вашата кујна.

Маслинки

Вариете од зелени и црни маслинки се другиот белег на Халкидики. Крупните и сочни маслинки се идеална основа за бројни кулинарски специјалитети. Илјадници жители на Халкидики одгледуваат маслинки, а во локалните продавници може да најдете совршено спакувани мали пакети со маслинки кои може да ги купите и како подарок.

Узо и Ципуро

Во Неа Фокеа каде големи површини се покриени со лозје, може да го најдете најдоброто ципуро и узо на Халкикдики. Овој вид на домашни грчки ракии заедно со останатите на нив слични, се типични апетизери на Халкидики. Тие се секојдневна сцена по грчките ресторани и таверни, вообичаено се консумираат за време на ручекот како предјадење со салата или со мезе.

Билки

Разновидни медитерански билки растат скоро на секој агол на полуостровот. На Халкидики може да најдете билки за секакво заболување и со најразлична намена. Повторно во сите поголеми и помали маркети имате убаво спакувани примероци кои се одличен оригинален подарок од Халкидики.

Тука ќе сретнете оригано кое се користи во многу месни јадења, готвен зеленчук, сосови и секако грчката салата; рузмарин кој се користи во разни сосови кои одат одлично со риба или со печени комири; мајчина душица како додаток во месни јадења, во маслинки и маслиново масло, и интересно како додаток во мед за посебен вкус; жалфија чиј мирис се чувствува низ планините, а се користи најчесто како чај; нане како додаток во месни топчиња и одредени пити и салати; босилек кој иако може да се види скоро на секој чекор, во градините, куќите, на покривите, по рестораните па дури и на бродовите, многу ретко се користи во готвените јадења; магдонос кој се користи најмногу како гарнир и декорација и во некои месни и зеленчукови јадења; ловоров лист како додаток во супи и чорби и уште многу други…

Мед

Познатиот мед од Агија Параскеви котира највисоко по квалитет во Грција. Може да се набави директно од производителите, но и по локалните продавници. Халкидики е мајка на пчеларството. Повеќе од 6.500 пчелари или околу 32% од вкупната бројка во Грција, годишно произведуваат околу 1900 тони мед, што е сам по себе доволен факт за Халкидики да биде карактеризиран како центарот на пчеларството во Грција. Медот од Халкидики е со висока нутритивна вредност, богат со минерали и со уникатен вкус.

Џемови и мармалади

На Халкидики се одгледуваат многубројни овошки на органски начин и со одличен квалитет. Овие вкусни овошја се базата и материјалот за подготовка на познатите мармалади и останати слатки деликатеси кои традиционално ги подготвуваат жените на Халкидики.
Нивниот висок квалитет, единствен вкус и традиционалниот карактер ги сместува во карактеристичен и омилен производ не само на грчкиот, туку и странскиот пазар. Овие слатки мали задоволства, може да го направат појадокот вкусен деликатес за секого.